本人第14本書《豐富人生》出版，9/20岡山樂群村新書發表會
「實習仔，會眩船hîn-tsûn袂？」船頂的人大部分攏用這句話招呼我，誠懷疑敢是船員守則有這條規定？
「袂啦！」高雄海專漁撈科畢業了後，坐這隻雙拖網siang-thua-bāng漁船hî-tsûn實習si̍t-si̍p做「海腳」。
大陳仔義胞「小陳」聽我講袂眩船誠懷疑：「真正袂眩船？等咧出港就知影，小心胃都會吐出來，呃！呃！呃！」
聽伊冷言冷語līng-giân-līng-gí都想欲吐矣，猶佇遐tī hia假鬼假怪ké-kuí-ké-kuài假掠兔仔lia̍h-thòo-á款。
氣象報告臺灣海峽八級大湧，港內無啥感覺，防波堤Hông-pho-thê共波浪阻擋佇堤防thê-hông外口，船一出防波堤就搖摵 iô-tshi̍k甲誠厲害，予阮體會啥物是「防波堤」，船頭對面挵著大湧，規隻船Kui-tsiah tsûn振動tsín-tāng甲強強滾kiông-kiông-kún發出「咚！咚咚！咚咚咚！」巨響。
誠實予小陳講對矣，真厲害的搖摵，親像欲將五臟掀出來看是毋是變形？無眩船的敢若攏無正常，船員攏總倒佇眠床頂。
床鋪Tshn̂g-phoo狹e̍h甲必須先將腳伸入去，閣用手搝khiú內底的拉桿，甲另外半截身軀搝入去，無睏過的人包穩pau-ún無法度入去，漁船頂連睏床鋪都欲實習。雖然床鋪誠狹，毋過M̄-koh船身予大湧tuā-íng搟甲hián kah左右搖幾十度，規个人予海湧躽nuà來躽去拍翸phah-phún佇倒爿柴門「碰」一聲，接落去躽去正爿挵到艙壁鐵枋「咚」一聲。
頂鋪的原住民「阿進」，予我「碰、咚、碰、咚……」吵甲睏袂去，頕頭Tàm-thâu落來敲我的門，手提救生衣，掠準Lia̍h-tsún伊欲提予我，趕緊說多謝閣伸手去接。
「毋是予你的啦！你去頭前艙內去提救生衣來楔縫seh-phāng，就袂翱翱輾kō-kō-liàn矣！」
果然頭前艙內底有一大堆救生衣，提四个楔佇身軀兩邊，頭猶是搖甲頭昏目暗，閣去提一个楔佇頭殼中央，規个人楔tsheh佇一堆救生衣內底，按呢才阻止身軀翱翱輾kō-kō-liàn矣，心內嘛感覺kám-kak足踏實tsiok ta̍h-si̍t，心內想：「按呢就算不幸真正反船píng-tsûn，五个救生衣嘛有夠力浮起規个人矣。」
這世人頭一擺拄著tú-tio̍h這種大風大湧，心頭湧起íng–khí驚船翻kiann tsûn-huan的掛意khuà-ì，跟綴Kin-tuè而來是無法度排除的驚惶kiann-hiânn感覺。
「叮噹！叮噹！叮噹！」拄才Tú-tsiah捙盤tshia-puânn好勢眠床bîn-tshn̂g，就聽著廚房總舖師搖鈴鐺叫逐家食飯，因為風湧hong-íng傷大siunn tuā無方便煮菜，出海第一个暗頓是一大鼎tsi̍t tuā tiánn麵，本底眩甲誠想欲掠兔仔一點仔都無胃口，看到薟薑仔hiam-kiunn-á共烏醋，將一碗麵濫甲變做酸辣麵sng-la̍t-mī，竟然刺激烏暗眩oo-àm-hîn的神經sîn-king恢復ho̍k-ho̍k開脾khui-pî連紲liân-suà食兩大碗，精神順勢sūn-sè好起來，予老船員換一副目鏡tsi̍t-hù ba̍k-kiànn看，包括小陳在內的誠濟船員攏眩甲爬袂起來食暗頓tsia̍h àm-tǹg。
「你嘛會眩船hîn-tsûn呢？」暗班掌舵的時陣問眩船眩甲敢若破病的小陳。
「你是怪胎，親像天生船員命。」小陳誠實吐矣，面色青恂恂tshenn-sún-sún貧惰pîn-tuānn講話。
這隻船三百外噸，船頂攏總廿一个人，有外省人、原住民、客人、臺灣人，聽講船頂無愛實習生，因為頭前的實習生眩船hîn-tsûn誠歹奉待phái-hōng-thāi。
過了臺灣海峽、巴士海峽，愈向低緯度駛落去天候thian-hāu愈好，風靜湧平 Hong-tsīnn-íng-pînn，遼闊Liâu-khuat的大海連接著闊茫茫khuah-bông-bông的青天 tshinn-thinn，予人心肝sim-kuann開闊khui-khuah。
「實習仔，緊咧！緊去駕駛臺，緊！」
「二公馬」佇船尾用雙手搝欄杆，尻川斗Kha-tshng-táu對著大海放屎，這是伊習慣放屎的方式，姿勢Tsu-sè真歹看pháinn-khuànn，佇遐哭爸哭母，我「鴨仔聽雷」毋清楚伊咧咻啥hiu siánn？尻川Kha-tshn脫光光家己袂見笑bē-kiàn-siàu，我顛倒tian-tò歹勢行頭前去看伊歹看相pháinn-khuànn-siùnn。
「恁娘咧，著釣矣！魚仔著釣矣！緊去叫駕駛臺減速，緊！緊！」
伊一隻手指點著船尾方向，一隻手搝百外公斤的身軀，予我真緊張kín-tiunn看伊搖搖欲墜落海tshū lo̍h-hái的人，伊煞愈急咧指向遠遠的海面。
船尾湧花無去bô-khì的所在，海面一隻大尾魚仔跳上水面，「二公馬」跔ku佇遐的欄杆lân-kan邊仔綁一條釣魚線，等我看清楚狀況，猶未Iû-bōe行到駕駛臺，伊又閣咧哀哀叫矣：「恁娘咧！走去矣！無魚仔通食矣！」
原來伊佇船尾拖釣，阮全速往澳洲漁場駛去，一點鐘十節，時速十海浬等於十八公里，這種速度拖釣傷緊淡薄仔tām-po̍h-á，魚仔著鉤嘛會因為船行傷緊siunn kín而脫鉤，必須欲減慢船速以減少著鉤tio̍h-kau的魚仔頂海湧hái-íng的阻力tsóo-li̍k，若無毋是魚鉤搝直去就是魚仔嘴搝裂開khiú-li̍h-khui脫鉤。
「二公馬」是山東仔，人誠高，共伊講話欲攑頭gia̍h-thâu，逐工穿短褲褪腹裼thǹg-pak-theh，開嘴就唸「恁娘咧！」，氣怫怫Khì-phut-phut去駕駛臺講：「恁娘咧！實習仔憨甲聽無我的話，真大隻一尾魚仔干焦賰半个嘴箍tshuì-khoo，剺破Lì-phuà面脫走矣，有夠無彩！」
船長足配合逐家，放慢速度釣魚仔違反公司規定，但是魚仔著鉤tio̍h-kau放慢速度收魚仔無要緊。
「恁娘咧！攏是實習仔害耶，若無，這馬嘛有魚仔好食矣。」食中晝頓時陣，「二公馬」面對無好的菜色，又閣咧怪我。
「你家己才憨呢！也袂曉用頭殼想想步數pōo-sòo，尻川脫光光佇遐咧哭呻khàu-tshan，我掠準你的卵葩lān-pha予鯊魚咬去矣咧！」進前一擺伊佇船尾放屎轉來一身軀澹漉漉tâm-lok-lok，就講尻川予海湧洗清氣矣，卵葩險險予鯊魚咬去。
我揣一塊鋼板固定佇釣繩正後面的欄杆，用一條較粗的尼龍線縛佇拖釣緄仔kún-á，另外一邊縛一个大螺絲母lôo-si-bó，閣用一條較細的尼龍線縛佇彼粒大螺絲母，另外一邊搝向前縛佇頭前面一支欄杆，魚仔若著鉤搝斷較細條的尼龍線，螺絲母大力挵著lòng-tio̍h鋼板發出砰一聲pōng tsi̍t siann，毋但駕駛臺聽會著，機艙當班人員佇較頂面艙層巡視攏會聽著壓過引擎聲的巨響。
我的特殊設計魚仔著鉤馬上見效，逐家攏聽著彼予人足暢的「噹」一聲，駕駛臺隨時減速，逐家走去船尾鬥相共tàu-sann-kāng搝魚仔，釣起來的是鬼頭刀。
「恁娘咧！猶是你這个小鬼較?gâu變鬼變怪，這鬼頭刀拄著你鬼頭鬼腦，莫怪欲食刀仔。」
彼套設計差不多百發百中pah-huat-pah-tiong，見擺「噹」聲響起，嘛毋免閣通知駕駛臺，逐家Ta̍k-ke就向船尾走去，尻脊骿Kha-tsiah-phiann黃綠色腹肚尾泛白的大魚仔予船搝佇水面頂滾絞kún-ká，魚鱗的閃光予阮誠暢tsiânn-thiòn，獨獨一擺凡勢是因為魚仔著鉤的時陣曳繩傷歪斜矣，螺絲母無拍著鋼板，逐家毋知魚鉤仔煞搝直去，攏總釣七尾鬼頭刀，船長講：「十節以上的速度，大部分干焦旗魚共鬼頭刀才追會著，這个海域凡勢無旗魚。」
航程十四工到澳洲漁場，鬼頭刀是「活潑魚族」，快速游動追浪揣食物，遮爾仔濟魚仔嘛食袂完，因為到漁場有誠濟好食的魚仔，所以釣七尾船長就下令收線，「大車」共船長是這隻船猶未落水就上船的元老，逐家Ta̍k-ke講「討海」一世人，這種船從來無人會當釣遮濟tsiah-tsōe魚仔，猶毋免費精神看釣仔，會當加菜攏是我的功勞，叫我申請專利！
總鋪師上蓋siōng-kài暢thiòng，拄出海彼幾工因為風湧大定定食麵，逐家猶未感覺各樣koh-iūnn，後來風湧較好矣，菜色煞無較好，一寡仔Tsi̍t-kuá-á船員就開始雜唸tsa̍p-liām講伊這擺佇岸頂一定閣跋輸筊pua̍h-su kiáu矣，逐擺跋輸筊就挪用伙食費害逐家口食無好料，有一寡仔船員已經準備變面，連紲Liân-suà釣著大魚予逐家會當食著鮮魚仔，拄好解除伊予人起呸面khí-phuì-bīn危機。
「這个長筒靴予你穿，洗魚仔袂使穿短雨鞋。」總舖師誠少tsiânn-tsiáu佮阮交陪kau-puê，暢甲竟然提一雙長達尻川kha-tshng的防水靴予我，但是我歹勢接受。
「這馬你毋知影m̄ tsai-iánn好用，作業時陣閣再予你好矣。」
原來阮佇高一米外的艙蓋頂面洗魚仔，短筒鞋仔一觸久仔tsi̍t-tak-kú-á就灌滿海水，毋穿又閣會予魚鰭佮海底各種針刺鑿著tsha̍k–tio̍h，無上過漁船仔的人根本毋知影m̄ tsai-iánn有長達尻川的防水靴，閣較免數想bián siàu-siūnn會準備矣，這雙靴子猶真是無穿袂使得！
長筒靴猶無夠，共款灌水入去，總舖師閣提一領按頷頸ām-kún頭前面閘甲跤頭趺kha-thâu-u的防水布借我，按呢才有法度遮閘jia-tsa̍h海水袂噴澹衫褲共身軀。
這種穿插實在袂堪得bē-kham–tit，佇三、四十度高溫的甲板面頂作穡tsoh-sit約兩點鐘，雖然無予海水噴澹，規身軀猶原流汗流甲澹漉漉tâm-lok-lok，黏黐黐Liâm-thi-thi澹糊糊tâm-kôo-kôo的感覺誠袂爽bē-sóng。
大副是福建人，身材矮閣肥，漚鬱熱àu-ut-jua̍h閣穿裘仔hiû-á，佮二公馬穿插tshīng-tshah拄好對反「陰陽怪氣im-iông-kuài-khì」，日時仔叫阮甲前艙的網子搬出來補，毋但補破網，閣將一片片網衣紩thīnn做網袋、網罟、網腳、網身等，慢慢縫紩pâng-thīnn製成一組拖網，閣再將球形浮標綁佇圍網頂面的曳綱，沉子綁佇網腳底部的曳綱，佇前往漁場的航程中完成一領預備的拖網，拄好Tú-hó佇一擺拖著規網礁石致使網仔規領破碎報銷的時陣提來用。
到漁場作業，佮二號子船輪流落網，一網緊則點半鐘，慢則兩點外鐘，漁獲濟少感覺會出來，機艙聲音變甲足沉，拖起來誠食力tsia̍h-la̍t的感覺，船長就下令起網作業，子船共母船無分暝日輪流落網，一直到兩隻船仔攏滿載為止。
「漁獲」猶包括礁石、鯊魚、魟仔魚、玳瑁佮大海龜等「雜貨」，閣欲費時費力清除，有的礁石欲幾个人才有法度攑起來擲㧒捔tàn-hiat-ka̍k，有的猶欲動用吊車；魟仔魚尾長長，尾部幾支有毒的倒刺，必須趕緊甲處理挕掉hìnn-tiāu；玳瑁共大海龜攏足重，有時陣猶須要用吊車才有法度送轉去大海。
大鯊魚猛強強bíng-kiàng-kiàng，必須先將伊拍死，無細膩Bô-sè-jī予伊的尾仔拍著馬上著傷，毋但有誠高危險性，猶會將其他魚仔拍害去。
「恁看，鯊魚彼搭hit-tah敢若kánn-ná查某tsa-bóo囡仔彼搭仝款kāng-khuán……」「豬哥賓仔」指著鯊魚的膣屄tsi-bai予阮看，坦白講，確實誠成tsiânn sîng！
「恁娘咧！你是毋是想欲發洩一下？貼你錢欲無？這隻『較幼齒』的留落來予你暢。」「二公馬」滾耍笑kún-sńg-tshiò。
「加揣幾个予我錢我就做，有錢罔趁ｂóng thàn。」「豬哥賓仔」本底就有淡薄仔tām-po̍h-á數想siàu-siūnn，看逐家咧吵抐tshá-lā，亦參逐家跟綴kin-tuè咧鬧。
「好，恁娘咧！等一下就看你表演。」
掠準Lia̍h-tsún逐家滾笑kún-tshiò，但是暗頓的時陣，聽大家滾笑討論彼隻母鯊魚毋知敢會大腹肚？鯊魚公主竟然有人翁、看伊敢若誠爽，擲落海猶無想欲走。
我無法度想像「人魚媾」情況，毋過大家講敢若有影有跡ū-iánn-ū-tsiah仝款？
船頂作業包括洗魚仔、分類裝箱，然後送入零下四十度急速冷凍艙凍結，艙面三十外度高溫，佇大日頭下跤，予長筒靴共規身軀雨布包牢的規身軀kui-sin-khu流汗流甲澹漉漉tâm-lok-lok，紲落去Suà–lo̍h-khì欲戴防寒頭套搬魚仔入急速冷凍庫，內外溫差七十外度，堅凍Kian-tàng矣閣再搬徙puann-suá到大艙冷藏，貯漁獲的大艙亦有零下十度，無停咧作穡tsoh-sit猶無感覺冷，停落來無振動就冷吱吱líng-ki-ki，冷凍共冷藏漁獲攏由「大公馬」指揮。
船員落大艙尿緊矣攏貧惰pîn-tuānn爬上二層樓高的艙面頂放尿，佇大艙排水口就地解決的時陣，尿佇艙底馬上鼻著阿摩尼亞a-móo-ní-á的味，彼是尿水結冰放出來的怪味。佇急速冷凍室必須欲輪流入去作穡tsoh-sit，十幾分鐘就欲換人，若無實在冷甲袂堪得bē-kham-tit，開冷凍機十外分鐘人就會堅凍，猶誠實有無細膩bô-sè-jī關佇內底凍死的例，「大公馬」特別教我按怎揣警報器求救。
魚鰭刺著傷是四常sù-siông的代誌，慣勢Kuàn-sì矣就會細膩提防，有一種透明的細刺根本防袂著hông buē tio̍h，拄開始作業的時陣，予刺黜thuh甲規手傷痕，戴幾若个手橐仔tshiú-lok-á仝款迵過thàng–kuè。
「彼是海底針，你無聽過『女人心像海底針』呢？戴閣較濟手橐仔都無路用，仝款刺甲你哀爸叫母ai-pē-kiò-bú。」
「恁哪會無予刺著？」
「阮『討海人』皮厚，過一睏仔tsi̍t-khùn-á你嘛袂驚矣！」
拄開始予刺黜著誠是足痛，兩隻手滿滿是紅癗luî脹膿tiùnn-lâng，逐工攏是仝款的工作，約半个月後，忽然感覺敢若無「海底針」矣，老胡講：「『海底針』四界滿滿是，只是你的皮嘛變厚矣！」
原來是愈來愈厚的趼lan，予遐的細刺黜袂入去，彼層厚皮結趼kiat-lan使手指頭仔都無法度蝹曲un-khiau，搦拳頭母Ni̍h-kûn-thâu-bó上濟會當搦甲一半，根本合袂密bē ba̍t，一擺佇刺目的日頭下底看著一支閃熾的「海底針」，刁持Tiau-tî提來黜手，真正黜袂入去，我已經親像「討海人」仝款，彼是男子漢的手，毋但查某囡仔、甚至佮查埔人tsa-poo-lâng握手時陣，對方都誠著驚的表情，問我是毋是練鐵砂掌？
海螺仔是船員爭奪的「私貨」，愈稀有的貝殼愈值錢，靠岸的時陣貝殼商就會上船收購。猶有強欲透明的「娃米呀uâ -mih-á」，彼就是乾貨店的「扁魚」，一擺拄好網著「娃米呀」魚群，這種船公司無愛的小魚仔，攏是賞予船員的禮物，囥佇煙筒邊的鋼板面頂，一工就會當烘甲焦涸涸ta-khok-khok。
猶有公司無愛的海蛇共海鰻，煞干焦我咧收集，喙齒Tshuì-khí足利的「錢鰻」共有毒的海蛇無人欲撿，聽講亦算中等價格，我將這長長的族群攏裝佇米袋仔內，回航時陣竟然裝了五袋，逐家講我發財矣，一公斤約二十箍，將近三千箍，1973年三千箍等於基層公務員一个外月薪水，這誠實是一筆意外之財！
「到港就會有人上船收購，逐家攏想欲撿，只是逐家攏咧作穡，無人敢撿，你是實習生無要緊，我有佮船長講過。」總舖師私底下共我講。
回航的時陣，因為覕風颱bih-hong-thai，佇南緯七度附近漂流，逐家佇船邊釣「南魷」，用八爪鉤釣八爪魚，一大群趨光性魷魚佇海中美麗悠游，按釣線感覺著鰇魚鬚jiû-hî-tshiu探餌的輕微抖動就小可仔sió-khuá-á往回搝一下，鰇魚鬚予魚鉤仔刺著感覺痛以後所有鬚爪攏會向前攬，這下才正港tsiànn-káng著鉤，必須欲「一手接一手」相連紲sio-liân-suà無停咧收線，藉海水阻力使鰇魚無法度脫鉤，釣起來船頂的鰇魚大部分攏會噴烏墨，這是鰇魚遇著gū-tio̍h危險自然反射，拄開始有人予鰇魚噴甲滿面規身軀烏墨，彼暗宵夜誠豐沛，規隻白煠pe̍h-sa̍h、或者烘、抑是「殺西米sā-si-mih」，攏誠好食，從來無食過遮爾新鮮的鰇魚。
到港以後，海關講實習生會使佇旗津先上岸，踏著陸地，無隆隆引擎聲的岸頂一片怪怪的恬靜tiām-tsīng，行佇路上若親像會挵著lòng-tio̍h人仝款，而且感覺猶是一直動搖tōng-iâu，厝主講這號做「眩山」。
第二工到前鎮漁港阮彼隻船頂，錢鰻共水蛇已經無去矣，問人攏毋知影佗位tó-uī去矣，船員逐家攏轉厝無佇船頂，佇船頂卸貨的工人我攏毋捌，嘛無法度揣著其他船員鬥相共tàu-sann-kāng，只好失望離開彼隻船。
阮毋但滿載，而且有誠濟高價的上等魚，算大豐收，按例分「菜魚」，提出霸魚、盤仔、紅袍、大海螺、龍蝦等高價魚類各兩箱分予船員，阮厝內人逐家攏講無食過遐爾hiah-nī好食的海味，因為彼幾種魚仔攏是賣予高級餐廳，外口菜市仔足少賣，阮庄下閣較毋捌看過。
漁船頂以賣魚所得分紅利，實習生分零點二股八千箍，佇1973年大約公務員三個月薪水，船員若一股就是四萬箍，等於公務人員一冬三個月薪水，莫怪足濟討海人做「海腳」。
兩雙手厚厚的結趼kiat-lan佇做兵前身體檢查時陣，負責檢查的人為我手指頭仔無法度搦拳頭拇la̍k-kûn-thâu-bú扣板機討論毋知會當ē-tàng做兵麼？因為一般船員攏必須做過兵，所以大家攏無看過手結趼遐爾厚甲無法度彎曲uan-khiau的案例，毋知這是討海人的「漁人手」。【版權所有 翻印必究】#漾新聞 #高雄 看更多新聞請點選【漾新聞官網】網址 https://youngnews3631.com/index.php
